पेट्रोल-डिझेल लवकरच होणार स्वस्त ?

नवी दिल्ली । पेट्रोल आणि डिझेलच्या किंमतीत लवकरच मोठी घसरण होण्याची शक्यता आहे. जागतिक कमॉडिटी बाजारात कच्च्या तेलाचा पुरवठा वाढवण्याचा महत्वाचा निर्णय कच्च्या तेलाची उत्पादक संघटना ‘ओपेक’ आणि इतर सहयोगी देशांनी घेतला आहे. परिणामी कच्च्या तेलाच्या किमती कमी होण्याची शक्यता आहे. तसे झाले तर भारतात देखील त्याचे परिणाम दिसून येतील. यामुळे पेट्रोल- डिझेल च्या किमती लवकरच कमी होण्याची शक्यता आहे.

गेल्या वर्षी करोना आणि लॉकडाउनमुळे इंधन मागणीत प्रचंड घसरण झाली होती. त्यामुळे ओपेक सदस्य देशांनी तेलाच्या उत्पादनात प्रती दिन सरासरी १० टक्के कपात केली होती. मात्र यामुळे जागतिक बाजारपेठेतील तेलाचा पुरवठा मर्यादित झाला. गेल्या काही महिन्यात अर्थव्यवस्था सावरू लागली असून इंधन मागणी वाढली आहे. दुसऱ्या बाजूला मर्यादित पुरवठ्याच्या कच्च्या तेलाच्या भाव ७८ डॉलरपर्यंत वाढला होता. तेलाने अडीच वर्षांतील उच्चांकी पातळी गाठली होती. सध्या भारत ७३ डॉलर प्रती बॅरलने तेलाची खरेदी करत आहे.

‘ओपेक’ आणि रशियासह इतर तेल उत्पादकांनी कच्च्या तेलाच्या उत्पादनात दररोज चार लाख बॅरलची वाढ करण्याचा निर्णय घेतला आहे. ऑगस्टपासून उत्पादनात वाढ होणार असून ती डिसेंबरपर्यंत सुरु राहणार आहे. २० लाख बॅरल प्रती दिन या क्षमतेपर्यंत ही उत्पादन वाढ सुरु राहणार असल्याचे ओपेकने म्हटलं आहे. यात संयुक्त अरब अमिरात, इराक आणि कुवेत या देशांना अतिरिक्त उत्पादनाचा कोटा देण्यात आला आहे. विशेष म्हणजे या तिन्ही देशांकडून भारत कच्च्या तेलाची आयात करतो. त्यामुळे भारताला पुढील काही महिने कच्च्या तेलाचा सुरळीत पुरवठा होण्याची शक्यता आहे.


दर कमी करण्यासाठी प्रयत्न
दरम्यान, नुकताच दिल्लीत मंत्रिमंडळ विस्तार पार पडला. यात काही मंत्र्यांची खाती बदलण्यात आली. धर्मेंद्र प्रधान यांच्याकडील पेट्रोलियम मंत्रालय हरदीपसिंग पुरी यांच्याकडे सोपवण्यात आले आहे. उत्पादन आणि पुरवठा वाढवण्याच्या ‘ओपेक’च्या करारानंतर पेट्रोलियम मंत्री हरदीप सिंग पुरी यांनी संयुक्त अरब अमिरात आणि सौदीच्या मंत्र्यांशी चर्चा केली आहे. इंधन पुरवठा वाढवणे आणि महागाई कमी करण्यासाठी सोबत काम करण्याची अपेक्षा पुरी यांनी या दोन्ही देशांकडे व्यक्त केली आहे.

You May Also Like