‘प्रवीण तरडे, मराठी प्रेक्षकांनी तुम्हाला कधीच माफ केलं नसतं’, विजू मानेची पोस्ट व्हायरल

मुंबई । शिवसेनेचे ज्येष्ठ नेते आनंद दिघे यांचावर ‘धर्मवीर मुक्काम पोस्ट ठाणे’ या बायोपिकला प्रेक्षकांकडून भरभरून प्रतिसाद मिळत आहे. या सिनेमाचं दिग्दर्शन प्रवीण तरडे यांनी केलं आहे. या सिनेमात आनंद दिघे यांची भूमिका प्रसाद ओक यानं साकारली आहे. प्रसादनं या भूमिकेला योग्य न्याय दिल्यानं प्रेक्षकांनी त्याच्यावर कौतुकाचा वर्षाव केला आहे.
धर्मवीर या सिनेमातील आनंद दिघे यांची भूमिका दिग्दर्शक विजू माने यांनी साकारावी अशी प्रवीण तरडे यांची इच्छा असल्याचं आता समोर आलं आहे. परंतु विजू माने यांनी या भूमिकेसाठी नकार दिला होता. नकार का दिला याचा खुलासा विजू माने यांनी एका पोस्टमध्ये केला आहे….विजू माने यांची ही पोस्ट सोशल मीडियावर खूपच व्हायरल झाली आहे.
—–काय म्हणाले विजू माने ?
विजू माने यांनी प्रवीण तरडे यांचा एक व्हिडिओ पोस्ट करत म्हटलं आहे की, ‘प्रवीण विठ्ठल तरडे…मराठी चित्रपट रसिकांनी तुम्हाला कधीच माफ नसतं केलं…… मराठी चित्रपटसृष्टीतील एक माईलस्टोन ठरलेला ‘धर्मवीर’ सिनेमा. मी ‘पांडू’ सिनेमा चित्रित करत असताना माझ्या कानावर आलं की प्रवीण तरडे ‘धर्मवीर’ नावाचा चित्रपट करतोय. सिनेमाचं शूट संपल्यावर पांडूचं प्रमोशन सुरू झालं. प्रवीण म्हणाला विजू धर्मवीर आनंद दिघे यांची भूमिका करशील का ? कारण तू त्यांना जवळून पाहिले आहेस. त्यांचा सहवास बराच तुला लाभला आहे. तुला त्यांची प्रत्येक वृत्ती, देहबोली, नजर, लकबी माहिती आहे. मी हसलो. मला वाटलं प्रवीण माझी मस्करी करतोय.’
‘प्रवीणला मी म्हणालो, तुला जी हवी ती मदत मी करेन त्यासाठी असं काही बोलायची गरज नाही. तो विषय टाळून आम्ही पुढे गेलो. पण प्रवीणने पुन्हा एकदा प्रमोशनच्या निमित्ताने भेटलो असता विषय काढला अरे विजू तुझी ऑडिशन कधी देतोयस? मी म्हटलं कसली ? तर म्हणाला ,धर्मवीर आनंद दिघे साहेबांच्या रोलची. अरे वेडा आहेस का ? त्या व्यक्तीचं चरित्र साकारणं? तेवढा बरा अभिनेता मी नाही. आणि जे मला जमणार नाही ते मी कधीच करणार नाही. माझ्या नकाराबद्दल तुला जरी वाईट वाटलं तरी हा निर्णय मी ठामपणे घेतलेला आहे. तुही असा विचार करू नकोस, खूप चांगले अभिनेते मराठी चित्रपटसृष्टीत आहेत आणि त्याला प्रसाद ओक दिसला….इतिहास घडला.’
—–प्रसादनं पडदा व्यापून टाकला आहे
विजू माने यांनी त्यांच्या फेसबुक पोस्टमध्ये पुढं लिहिलं आहे की, ‘धर्मवीर’ सिनेमा पाहिल्यावर तुमच्या लक्षात येईल की मी जर प्रवीण तरडेला होकार कळवला असता, तर त्या सिनेमाचं काय होऊ शकलं असतं. इतका अप्रतिम सिनेमा झाला आहे. प्रसादच्या अभिनयानं तो एका वेगळ्याच उंचीवर नेऊन ठेवला आहे. एका मुलाखतीत म्हटल्याप्रमाणे ‘धर्मवीर’ या सिनेमापासून मराठी चित्रपटसृष्टीत प्रसादपर्व सुरू होणार आहे. प्रसाद माझा लाडका अभिनेता आहेच, चांगला मित्र आहे.’
‘माझ्या ‘ती रात्र’, ‘खेळ मांडला’, ‘शिकारी’ अशा सिनेमांमध्ये तो प्रमुख भूमिकेत आहे. मला नेहमी असं वाटायचं की मराठी चित्रपटसृष्टीत दोन अभिनेते असे आहेत ज्यांना त्यांच्या क्षमता सिद्ध करणारं काम मिळालेलं नाही. यातील एक अभिजीत चव्हाण आणि दुसरा म्हणजे प्रसाद. ‘धर्मवीर’ सिनेमा पाहताना अभिनयाने ‘पडदा व्यापून टाकला’ म्हणजे काय हे कळतं. प्रसाद प्रसाद आणि प्रसाद… मला तर अनेकदा शंका यायची प्रसादच्या अंगात प्रत्यक्ष दिघेसाहेब यायचे की काय.’
—–प्रसाद भूमिका जगला आहे
विजू माने यांनी पुढं लिहिलं आहे की, ‘मी एकदा सहज सेटवरही गेलो होतो. तिचे प्रसाद माझ्याशी गप्पा मारत होता. अचानक टेक सुरू झाला. प्रसादने डोळे बंद केले आणि कॅमेऱ्यासाठी डोळे उघडले. ते मला प्रसादचे वाटलेच नाहीत. ते धर्मवीरांचे होते…’
विजू माने यांच्या पोस्टवर प्रसाद ओकनं देखील कमेंट केली आहे. त्याने म्हटलं की, ‘विजू मित्रा तुझ्यासारख्या सच्च्या, मनमोकळेपणांनी व्यक्त होणाऱ्या माणसांची समाजात (म्हणजे आपल्या सो कॉल्ड इंडस्ट्रीत ) नितांत गरज आहे. याचं कारण आहे तुझी कामावरची ‘निष्ठा’ आणि निष्ठेने काम करणाऱ्या प्रत्येकावरचं तुझं प्रेम. तू जे करतोस ते चांगलं वाईट, चाललं, नाही चाललं, आवडलं, नाही आवडलं यापलीकडे जाऊन निष्ठेने करतोस. कदाचित हाच दुवा असेल आपल्या निरपेक्ष मैत्रीचा आणि हाच ठेवा असेल माझा तुझ्या माझ्यावरच्या प्रेमाचा.’ दरम्यान, विजू माने यांच्या या पोस्टवर अनेक चाहत्यांनी जशा कमेन्ट केल्या आहेत, तशा अनेक कलाकार मंडळींनीही भरभरून कमेन्ट केल्या आहेत. विजू माने यांची ही पोस्ट सोशल मीडियावर खूपच व्हायरल झाली आहे.

You May Also Like