दिलासादायक.. राज्यात ऑक्सिजनच्या मागणीत घट..

मुंबई : करोनाची दुसरी लाट आता हळूहळू ओसरत आहे. राज्यातील रुग्णांची संख्या घटत असून परिणामी सक्रिय रुग्णांची संख्या ही कमी झाली आहे. याअनुषंगाने आता राज्यातील वैद्यकीय वापरासाठीच्या ऑक्सिजनची गरजही कमी झाली आहे. त्यामुळेच दहा दिवसांपूर्वी जिथे दिवसाला 1800 मेट्रिक टन ऑक्सिजन लागत होते तिथे आज दिवसाला 1400 मेट्रिक टन ऑक्सिजन लागत असल्याची माहिती डी आर गहाणे, सहआयुक्त, (औषध), मुख्यालय, अन्न आणि औषध प्रशासन (एफडीए) यांनी दिलीयं.

करोनाच्या पहिल्या लाटेत दिवसाला 850 मेट्रिक टन ऑक्सिजन लागत होता. मात्र त्याचवेळी राज्यात 1200 मेट्रिक टन ऑक्सिजनची निर्मिती होत होती. तर यातील अंदाजे 40 टक्के ऑक्सिजन वैद्यकीय वापरासाठी उपलब्ध होत होता. पण ऑक्सिजनची मागणी वाढल्याने सरकारने 80 टक्के वैद्यकीय तर 20 टक्के औद्योगिक वापरासाठी असा ऑक्सिजनचा वापर करणे बंधनकारक केले. त्यामुळे पहिल्या लाटेत ऑक्सिजनचा तुटवडा काही दिवसांतच दूर झाला. पण दुसर्‍या लाटेत मात्र परिस्थिती गंभीर झाली. कारण पहिल्या लाटेत जिथे 25 ते 28 हजार रुग्ण दिवसाला आढळत होते तिथे दुसर्‍या लाटेत 60 हजाराहून अधिक रुग्ण दिवसाला आढळू लागले. तर सक्रिय रुग्णांचा आकडा सहा ते साडे लाखावर गेला. यातील 10 टक्के गंभीर रुग्णांना ऑक्सिजन लागू लागला. याअनुषंगाने दिवसाला 1800 मेट्रिक टन ऑक्सिजन लागू लागला. पण राज्यात केवळ 1200 मेट्रिक टन ऑक्सिजनची निर्मिती होत असताना 1700 ते 1800 मेट्रिक टन ऑक्सिजन कसा उपलब्ध करून द्यायचा असा प्रश्न एफडीएसमोर उभा ठाकला. यातूनच मोठ्या प्रयत्नाने ऑक्सिजनचे उत्पादन 150 मेट्रिक टनने वाढवले. बंद कंपन्या सुरू करत, काही कंपन्याकडून उत्पादन वाढवत 150 मेट्रिक टन ऑक्सिजनचा पुरवठा एफडीएने आता वाढवला आहे. तर उर्वरित ऑक्सिजन इतर राज्यातून मागवण्यात येत आहे.

You May Also Like