वेळ देऊनही साहेब भेटले नाहीत, वसंत मोरेंनी सांगितली ‘राज की बात’

पुणे । मनसे अध्यक्ष राज ठाकरे आणि मनसे नेते वसंत मोरे यांची बुधवारी भेट होणार होती. राज ठाकरे यांनी वसंत मोरे यांना भेटीची वेळही दिली होती. पण तब्येत बरी नसल्याने राज ठाकरे वसंत मोरे यांना न भेटताच मुंबईला रवाना झाले. यानंतर राज ठाकरे यांनी वसंत मोरेंची भेट टाळली, अशा चर्चा राजकीय वर्तुळात सुरु झाल्या. याच सगळ्या घडामोडींवर वसंत मोरे यांनी स्वत: प्रतिक्रिया दिली आहे. “राज ठाकरे यांची प्रकृती बरी नसल्याने ते घाईघाईत मुंबईला गेले पण पुढच्या वेळी ते मला नक्की भेटतील. माझ्या समस्या मी त्यांच्या कानावर टाकेन, मला विश्वास आहे, माझी नाराजी नक्की दूर होईल”, असं वसंत मोरे म्हणाले.
अयोध्या दौऱ्यावर जाण्याआधी राज ठाकरे यांची पुण्यात सभा होणार आहे. त्याच सभेच्या नियोजनासाठी आणि मनसे पदाधिकाऱ्यांच्या भेटीगाठीसाठी राज ठाकरे २ दिवसीय पुणे दौऱ्यावर होते. सभेच्या नियोजनासाठी त्यांनी मंगळवारी आणि बुधवारी मनसे पदाधिकाऱ्यांशी संवाद साधला. पावसाच्या शक्यतेने त्यांनी आपली सभा पुढे ढकलण्याचा निर्णय घेतला. २२ मे रोजी गणेश कला क्रीडा मंच येथे सभा होणार आहे. तत्पर्वी पायाच्या दुखण्यामुळे राज ठाकरे मुंबईकडे रवाना झाले. पण त्याअगोदर त्यांनी वसंत मोरे यांना भेटीसाठी वेळ दिली होती. मात्र वसंत मोरे यांना न भेटताच राज ठाकरे मुंबईकडे रवाना झाले. ज्यानंतर राजकीय वर्तुळात उठलेल्या वादळावर वसंत मोरे यांनी स्पष्टीकरण दिलं.
—–म्हणून भेटीची वेळ देऊनही साहेब मला भेटले नाहीत!
“राज ठाकरे मला बुधवारी भेटणार होते. पण अचानक त्यांना पायाचा त्रास व्हायला लागला. मग ते घाईघाईत मुंबईला रवाना झाले पण पुढच्या वेळी मला ते नक्की भेटतील. माझ्या समस्या मी त्यांच्या कानावर टाकेन, मला विश्वास आहे, माझी नाराजी नक्की दूर होईल”, असं वसंत मोरे म्हणाले.
—–राज ठाकरेंच्या सभेचं नियोजन करणार
“राज ठाकरे यांची येत्या २२ मे रोजी पुण्यात सभा पार पडणार आहे. या सभेचं जंगी नियोजन मी माझ्या पद्धतीने करणार आहे. पक्षातील लोकांचीही मला साथ असेन. राज ठाकरे यांच्या सभेचं नियोजन भव्य दिव्य करण्याचा मी प्रयत्न करेन”, असंही वसंत मोरे यांनी सांगितलं.

You May Also Like